പൊതുവേദിയിൽ ഹിന്ദി ഒഴിവാക്കി, തമിഴിൽ സംസാരിക്കാൻ ഭാര്യയോട് അഭ്യർത്ഥിച്ച് എ ആർ റഹ്മാൻ. ചെന്നൈയിൽ ഒരു അവാർഡുദാന ചടങ്ങിനിടെയാണ് സംഭവം. തമിഴ്നാട്ടിൽ ഹിന്ദി വിരുദ്ധ വികാരം നിലനിൽക്കുന്നതിനിടെയാണ് എ ആർ റഹ്മാന്റെ പരാമർശം. ചടങ്ങിലെ വീഡിയോ സോഷ്യൽ മീഡിയയിൽ വൈറലാണ്.

ആദ്യം റഹ്മാൻ സംസാരിച്ച ശേഷം സൈറ ബാനുവിനോട് സംസാരിക്കാൻ അവതാരക ആവശ്യപ്പെട്ടപ്പോഴാണ് തമിഴിൽ സംസാരിക്കൂവെന്ന ചിരിയോടെ റഹ്മാൻ ഓർമിപ്പിച്ചത്. റഹ്മാൻ സംസാരിച്ചതും തമിഴിലായിരുന്നു. എന്റെ അഭിമുഖങ്ങൾ വീണ്ടും കാണാൻ എനിക്ക് ഇഷ്ടമല്ല , എന്നാൽ ഭാര്യ കാണും, എന്റെ ശബ്ദം ഇഷ്ടമായതിനാലാണ് അഭിമുഖങ്ങൾ ആവർത്തിച്ച് കാണുന്നത് എന്നായിരുന്നു റഹ്മാന്റെ വാക്കുകൾ. ഇതിനുള്ള മറുപടി പറയുന്നതിനാണ് അവതാരക സൈറ ബാനുവിനെ ക്ഷണിച്ചത്. പിന്നാലെയാണ് തമിഴിൽ സംസാരിക്കൂ എന്ന് റഹ്മാൻ പറഞ്ഞതും

എന്നാൽ തമിഴിൽ വ്യക്തമായി സംസാരിക്കാൻ അറിയാത്തതിൽ ക്ഷമ ചോദിച്ച സൈറ ഇംഗ്ലീഷിൽ ആണ് മറുപടി പറഞ്ഞത്. റഹ്മാന്റെ ശബ്ദത്തോടാണ് ജീവിതത്തിൽ ഏറ്റവും ഇഷ്ടം. ആ ശബ്ദവുമായി ഞാൻ പ്രണയത്തിലാണ് എന്നായിരുന്നു സൈറയുടെ പ്രതികരണം.

മണിരത്നത്തിന്റെ പൊന്നിയിൻ സെൽവൻ 2വാണ് റഹ്മാന്റെ സംഗീതത്തിൽ പുറത്തിറങ്ങാനിരിക്കുന്ന ചിത്രം. പൊന്നിയിൻ സെൽവൻ 2 ഏപ്രിൽ 28ന് തിയേറ്ററുകളിലെത്തും. മാരി സെൽവരാജിന്റെ സംവിധാനത്തിൽ പുറത്തിറങ്ങാനിരിക്കുന്ന മാമന്നനും ആർ രവികുമാറിന്റെ സംവിധാനത്തിൽ പുറത്തിറങ്ങാനിരിക്കുന്ന അയാലനും ആണ് റഹ്മാന്റെ സംഗീത സംവിധാനത്തിൽ വരാനിരിക്കുന്ന മറ്റു ചിത്രങ്ങൾ