ആദ്യ ദിന പ്രീബുക്കിങ്ങിൽ കെജിഎഫിനെ പിന്നിലാക്കി വിജയ് - ലോകേഷ് ചിത്രം ലിയോ. 7.25 കോടി രൂപയുമായി കെജിഎഫ് ചാപ്റ്റർ 2 ആയിരുന്നു കേരളത്തിലെ ഇതുവരെയുളള ആദ്യദിന ബുക്കിങ്ങ് കളക്ഷനിൽ മുന്നിൽ. ആ റെക്കോർഡ് തിരുത്തിയെഴുതിയ ലിയോ. ആദ്യ ദിനം 7.3 കോടി രൂപയുടെ കളക്ഷൻ നേടിയതായാണ് അണിയറക്കാർ നൽകുന്ന വിവരം. ഒക്ടോബർ 19നാണ് ചിത്രം തിയറ്ററുകളിൽ എത്തുന്നത്.

ഞായറാഴ്ച രാവിലെ പത്തിന് ആരംഭിച്ച ലിയോയുടെ ടിക്കറ്റ് ബുക്കിങ് റെക്കോർഡ് നേട്ടത്തിലേക്ക് കുതിക്കുന്നതായും രണ്ടാം ദിനമായ തിങ്കളാഴ്ച ആദ്യ മണിക്കൂറുകളിൽതന്നെ കളക്ഷൻ ഒരു കോടി പിന്നിട്ടതായും ദേശീയ മാധ്യമങ്ങൾ റിപ്പോർട്ട് ചെയ്തിരുന്നു. എന്നാൽ രണ്ടാം ​ദിന കളക്ഷന്റെ ഔദ്യോ​ഗികവിവരങ്ങൾ അണിയറക്കാർ പുറത്തുവിട്ടിട്ടില്ല.

എട്ട് ലക്ഷത്തോളം ടിക്കറ്റുകളാണ് ഞായറാഴ്ച ആദ്യ മണിക്കൂറുകളിൽ തന്നെ ബുക്ക് മൈ ഷോയിൽ മാത്രം വിറ്റുപോയത്. തിയേറ്ററുകളിലും വൻ തിരക്കാണ് അനുഭവപ്പെട്ടത്. ആദ്യ ദിന കളക്ഷൻ മാത്രം പരി​ഗണിച്ചാൽ ആ​ഗോള തലത്തിൽ അൻപത് കോടിക്ക് മുകളിൽ ബിസിനസ് നടന്നുവെന്നാണ് ട്രേഡ് അനലിസ്റ്റുകൾ നൽകുന്ന സൂചന.

തിരുവനന്തപുരം ഏരീസ് പ്ലക്സ് ആദ്യദിനത്തിലെ പ്രീ-സെയിൽ കണക്ക് പുറത്തുവിട്ടതും വാർത്തകളിൽ ഇടം പിടിച്ചിരുന്നു. കഴിഞ്ഞ ദിവസം വരെയും ആദ്യദിന പ്രീ സെയിലിൽ മുന്നിലുണ്ടായിരുന്നത് രജനികാന്ത് നായകനായെത്തിയ യന്തിരൻ 2.0 ആയിരുന്നു. എന്നാൽ ലിയോ ബുക്കിങ് ആരംഭിച്ചതോടെ ആ കണക്ക് പഴങ്കഥയായി മാറിയെന്നായിരുന്നു ഏരീസ് പ്ലക്സ് പുറത്തുവിട്ട വിവരം. ലിയോയാണ് ഏരീസ് പ്ലക്സിൽ ഇപ്പോൾ മുന്നിൽ നിൽക്കുന്ന ചിത്രം. 16.53ലക്ഷം രൂപയാണ് ആദ്യ ദിന കളക്ഷൻ.