മിന്നുന്ന പ്രകടനവുമായി ഇന്ത്യയുടെ സ്റ്റാര്‍ ഷട്ട്‌ലര്‍ ലക്ഷ്യ സെന്‍ കാനഡ ഓപ്പണ്‍ ബാഡ്മിന്റണ്‍ കിരീടം ചൂടി. ഇന്നു പുലര്‍ച്ചെ നടന്ന ഫൈനലില്‍ നേരിട്ടുള്ള ഗെയിമുകള്‍ക്ക് ചൈനയുടെ ലി ഷി ഫെങ്ങിനെയാണ് ലക്ഷ്യ തോല്‍പിച്ചത്. സ്‌കോര്‍ 21-18, 22-20. ലക്ഷ്യയുടെ ആദ്യ സൂപ്പര്‍ 500 സീരീസ് കിരീടമാണിത്.

ഓള്‍ ഇംഗ്ലണ്ട്് ചാമ്പ്യനായ ഫെങ് ലക്ഷ്യയ്ക്ക് കടുത്ത വെല്ലുവിളി ഉയര്‍ത്തുമെന്നാണ് കരുതിയത്. എന്നാല്‍ ഇന്ത്യന്‍ താരത്തിന്റെ തകര്‍പ്പന്‍ പ്രകടനത്തിനു മുന്നില്‍ വെറും 58 മിനിറ്റുകൊണ്ട് ചൈനീസ് താരം കീഴടങ്ങി. നിലവിലെ കോമണ്‍വെല്‍ത്ത് ഗെയിംസ് സ്വര്‍ണമെഡല്‍ ജേതാവ് കൂടിയാണ് ലക്ഷ്യ സെന്‍.

കഴിഞ്ഞ ഓഗസ്റ്റില്‍ കോമണ്‍വെല്‍ത്ത് സ്വര്‍ണം നേടിയ ശേഷം ലക്ഷ്യയുടെ ആദ്യ കിരീടം നേട്ടം കൂടിയാണിത്. അതിനു പുറമേ ഈ വര്‍ഷം ഏതെങ്കിലുമൊരു ചാമ്പ്യന്‍ഷിപ്പില്‍ പുരുഷ വിഭാഗം ബാഡ്മിന്റണ്‍ കിരീടം നേടുന്ന രണ്ടാമത്തെ മാത്രം ഇന്ത്യന്‍ താരവും. മലേഷ്യന്‍ മാസ്‌റ്റേഴ്‌സ് കിരീടം നേടിയ എച്ച്.എസ്. പ്രണോയിയാണ് മറ്റൊരാള്‍.