വീണ്ടും സംവിധായകനായി ധനുഷ്; മൂന്നാം ചിത്രം ഡിസംബറിൽ ആരംഭിക്കും

ധനുഷ് സംവിധായകനാവുന്ന മൂന്നാമത്തെ ചിത്രം അണിയറയിൽ ഒരുങ്ങുന്നു. നായകനായി അഭിനയിക്കുന്ന അമ്പതാമത് ചിത്രം സംവിധാനം ചെയ്തതിന് പിന്നാലെയാണ് അടുത്ത ചിത്രവും ധനുഷ് സംവിധാനം ചെയ്യുന്നത്.

രാജ് കിരണും രേവതിയും അഭിനയിച്ച 'പാ പാണ്ടി'യായിരുന്നു ധനുഷ് സംവിധാനം ചെയ്ത ആദ്യ ചിത്രം. മൂന്നാമത്തെ ചിത്രത്തിന്റെ ചിത്രീകരണം ഡിസംബറിൽ ആരംഭിക്കുമെന്നാണ് റിപ്പോർട്ട്.

ധനുഷിന്റെ സഹോദരിയുടെ മകൻ വരുൺ പ്രധാന വേഷത്തിലെത്തുന്ന ചിത്രത്തിന്റെ ഷൂട്ടിങ് ഇതിനോടകം ആരംഭിച്ചിട്ടുണ്ടെന്നാണ് അനൗദ്യോഗിക റിപ്പോർട്ടുകൾ. സിനിമയുടെ ഔദ്യോഗിക പ്രഖ്യാപനം ശനിയാഴ്ച നടക്കും.

ധനുഷിന്റെതന്നെ നിർമാണ കമ്പനിയായ വണ്ടർബാർ ഫിലിംസാണ് ചിത്രം നിർമിക്കുന്നത്. ചിത്രത്തിലെ മറ്റ് അഭിനേതാക്കളെയും അണിയറപ്രവർത്തകരെയും കുറിച്ചുള്ള വിവരങ്ങൾ ഇതുവരെ പുറത്തുവിട്ടിട്ടില്ല.

ധനുഷ് സംവിധാനം ചെയ്ത രണ്ടാമത്തെ ചിത്രം 'ഡി 50' യിൽ ധനുഷിന് പുറമെ എസ് ജെ സൂര്യ, സുന്ദീപ് കിഷൻ, കാളിദാസ് ജയറാം, നിത്യ മേനോൻ, ദുഷാര വിജയൻ, അപർണ ബാലമുരളി എന്നിവരും അഭിനയിക്കുന്നുണ്ട്. ചിത്രീകരണം പൂർത്തിയായ 'ഡി 50' പോസ്റ്റ് പ്രൊഡക്ഷൻ വർക്കുകളിലേക്ക് കടന്നു.

അരുൺ മാതേശ്വരൻ സംവിധാനം ചെയ്യുന്ന 'ക്യാപ്റ്റൻ മില്ലർ' ആണ് ധനുഷ് അഭിനയിച്ച് റിലീസിന് ഒരുങ്ങുന്ന അടുത്ത ചിത്രം. പൊങ്കൽ റിലീസായി ജനുവരിയിലാണ് ചിത്രം തിയേറ്ററിലെത്തുക.

സെന്തിൽ ത്യാഗരാജനും അർജുൻ ത്യാഗരാജനും ചേർന്ന് നിർമിക്കുന്ന ചിത്രം സത്യജ്യോതി ഫിലിംസിന്റെ ബാനറിൽ ടി ജി ത്യാഗരാജനാണ് അവതരിപ്പിക്കുന്നത്.

പ്രിയങ്ക അരുൾ മോഹൻ ആണ് ചിത്രത്തിലെ നായിക. ഡോ. ശിവരാജ്കുമാർ, സന്ദീപ് കിഷൻ എന്നിവരും ചിത്രത്തിൽ അഭിനയിക്കുന്നുണ്ട്.