ചാക്കോച്ചന്‍-ജയസൂര്യ കൂട്ടുകെട്ടില്‍ 'എന്താടാ സജി'; ഫസ്റ്റ് ലുക്ക് പോസ്റ്റര്‍ പുറത്ത്
ഷാജഹാനും പരീക്കുട്ടിക്കും ശേഷം കുഞ്ചാക്കോ ബോബനും ജയസൂര്യയും ഒന്നിക്കുന്ന ' എന്താടാ സജി'യുടെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. നിവേദ തോമസാണ് ചിത്രത്തിലെ നായിക. ഏറെ നാളുകള്‍ക്ക് ശേഷമാണ് നിവേദ മലയാളത്തിലേക്ക് തിരിച്ചുവരുന്നത്. നവാഗതനായ ഗോഡ്ഫി സേവിയര്‍ ബാബു രചനയും സംവിധാനവും നിര്‍വഹിക്കുന്ന ചിത്രത്തിന്റെ ഛായാഗ്രഹണം ജിത്തു ദാമോദര്‍ ആണ്. മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനാണ് ചിത്രം നിര്‍മിക്കുന്നത്.
പോസ്റ്റര്‍ സൂചിപ്പിക്കുന്നതുപോലെ തന്നെ ചിത്രത്തിന്റെ ടൈറ്റില്‍ റോളിലാണ് ജയസൂര്യ എത്തുന്നത്. തുല്യപ്രാധാന്യമുള്ള കഥാപാത്രം തന്നെയാണ് കുഞ്ചാക്കോ ബോബനും അവതരിപ്പിക്കുന്നത് എന്നാണ് സൂചനകള്‍. കഴിഞ്ഞ നവംബറില്‍ ചിത്രത്തിന്റെ മോഷന്‍ പോസ്റ്റര്‍ പുറത്തുവിട്ടിരുന്നു. കുഞ്ചാക്കോ ബോബന്റേയും ജയസൂര്യയുടേയും കഥാപാത്രങ്ങള്‍ തമ്മില്‍ സംസാരിക്കുന്നതായിരുന്നു മോഷന്‍ പോസ്റ്റര്‍. ഫാമിലി എന്റര്‍ടെയിന്‍മെന്റാണ് ചിത്രം.
ലൈന്‍ പ്രൊഡ്യൂസര്‍ സന്തോഷ് കൃഷ്ണന്‍, ഒറിജിനല്‍ ബാക്ക്ഗ്രൗണ്ട് സ്‌കോര്‍ ജേക്സ് ബിജോയ്, എഡിറ്റിങ് രതീഷ് രാജ്, സംഗീതം വില്യം ഫ്രാന്‍സിസ്, കലാസംവിധാനം ഷിജി പട്ടണം, എക്‌സിക്യൂട്ടീവ് പ്രൊഡ്യൂസര്‍ നവീന്‍ പി.തോമസ്, മേക്കപ്പ് റോണക്‌സ് സേവ്യര്‍.
