ആരാധകർ നിർമിച്ച മോനയുടെ ട്രെയിലർ പുറത്ത്; ടൈറ്റിൽ റോളിൽ എത്തുന്നത് സെൻഡയ ആണോ?
2016-ൽ പ്രദർശനത്തിനെത്തിയ പ്രശസ്ത ആനിമേഷൻ ചിത്രം മോന റീമേക്കിന് ഒരുങ്ങുകയാണ്. സിനിമയിൽ ടൈറ്റിൽ റോൾ ചെയ്ത ഓലി ക്രാവൽഹോ റീമേക്കില്‍ ആ വേഷം ചെയ്യുന്നില്ലെന്ന് സ്ഥിരീകരിച്ചിരുന്നു. ഡെമി-ഗോഡ് മൗയിയുടെ വേഷത്തിൽ ഡ്വെയ്ൻ ജോൺസൺ തിരിച്ചെത്തുമെന്നാണ് പുറത്തുവരുന്ന വിവരം. എന്നാൽ ചിത്രത്തിലെ നായിക ആരെന്നുളള വിവരം ഇതുവരെയും ചിത്രം നിർമിക്കുന്ന ഡിസ്നി പുറത്തുവിട്ടിട്ടില്ല.
അടുത്തിടെ, മോനയുടെ ആരാധകർ നിർമിച്ച ട്രെയിലർ സോഷ്യൽ മീഡിയയിൽ വൈറലായിരുന്നു. ചിത്രത്തിന്റെ അഭിനേതാക്കളെയും അതിന്റെ വരാനിരിക്കുന്ന ഔദ്യോഗിക ട്രെയിലറിനെയും കുറിച്ചുള്ള പ്രധാനപ്പെട്ട വിവരങ്ങൾ ഈ ട്രെയിലറിലുണ്ടെന്നാണ് അവകാശവാദം. മോനയെ അവതരിപ്പിക്കാൻ സെൻഡയ എത്തുന്നുവെന്നാണ് ട്രെയിലർ സൂചിപ്പിക്കുന്നത്. ആരാധകർ തയ്യാറാക്കിയ ട്രെയിലർ ഉള്ളടക്കം ശരിയാണെങ്കിൽ, വരാനിരിക്കുന്ന ചിത്രത്തിലെ ടൈറ്റിൽ കഥാപാത്രമായി നടി ഓലി ക്രാവൽഹോ ഉണ്ടായിരിക്കില്ല. അതേസമയം, മൗയിയായി ഡ്വെയ്ൻ ജോൺസൺ തിരിച്ചെത്തുമെന്നാണ് ട്രെയിലർ നൽകുന്ന സൂചന.
എന്നാൽ, വരാനിരിക്കുന്ന ചിത്രത്തെക്കുറിച്ചുള്ള പ്രധാന വിവരങ്ങൾ വെളിപ്പെടുത്തിയിരിക്കുന്നുവെന്ന് അവകാശപ്പെടുന്ന ആരാധകരുടെ ട്രെയിലറിനോട് സെൻഡയയും ഡിസ്‌നിയും ഇതുവരെ പ്രതികരിച്ചിട്ടില്ല. നേരത്തെ, ഈ വർഷം വരാനിരിക്കുന്ന ലൈവ്-ആക്ഷൻ സിനിമയിൽ താൻ വീണ്ടും മോനയായി അഭിനയിക്കുന്നില്ലെന്ന് ഓലി ക്രാവൽഹോ വെളിപ്പെടുത്തിയിരുന്നു. ഇൻസ്റ്റാഗ്രാം വീഡിയോയിലൂടെയാണ് നടി പ്രധാന പ്രഖ്യാപനം നടത്തിയത്.
"14-ാം വയസ്സിൽ മോനയായി അഭിനയിച്ചപ്പോൾ, അത് എന്റെ ജീവിതത്തെ മാറ്റിമറിക്കുകയും എന്റെ കരിയർ ആരംഭിക്കുകയും ചെയ്തു. വരുന്ന റീമേക്കിൽ ഞാൻ അഭിനയിക്കുന്നില്ല. കാസ്റ്റിങ് നമ്മുടെ കഥാപാത്രങ്ങളെയും കഥകളെയും കൃത്യമായി പ്രതിനിധീകരിക്കുന്നത് അത്യന്താപേക്ഷിതമാണെന്ന് ഞാൻ വിശ്വസിക്കുന്നു. മോനയുടെ ധൈര്യവും ബുദ്ധിയും വൈകാരിക ശക്തിയും ചിത്രീകരിക്കാൻ അടുത്ത നടിയെ കണ്ടെത്താൻ എനിക്ക് കാത്തിരിക്കാനാവില്ല," അടുത്തിടെ അവർ ഒരു വീഡിയോയിൽ പറഞ്ഞു. അതേസമയം, നിർമാതാക്കളിൽ ഒരാളെന്ന നിലയിൽ ഓലി ക്രാവൽഹോ ഇപ്പോഴും റീമേക്കിന്റെ ഭാഗമാണ്.
