നിവിൻ പോളി ചിത്രം ഹോളിവുഡ് സ്റ്റൈലിലോ?; ലൊക്കേഷൻ ചിത്രങ്ങൾ പങ്കുവച്ച് അണിയറ പ്രവർത്തകർ

നിവിൻ പോളിയുടെ 42-ാം ചിത്രത്തിന്റെ ഷൂട്ടിങ് ദുബായിൽ പുരോ​ഗമിക്കുകയാണ്. ദുബായിൽ നിന്നുള്ള ലൊക്കേഷൻ ചിത്രങ്ങൾ ഇതിനോടകം തന്നെ സമൂഹ മാധ്യമങ്ങളിൽ വൈറലായിരുന്നു. ഇപ്പോഴിതാ ചിത്രത്തിന്റെ ഷൂട്ടിങിനായി ഉപയോഗിച്ച ക്യാമറയുടെ ചിത്രങ്ങളാണ് അണിയറ പ്രവർത്തകർ പുറത്തുവിട്ടിരിക്കുന്നത്. എൻപി 42 എന്ന് പേരിട്ടിരിക്കുന്ന ക്യാമറ ഹോളിവുഡ് ചിത്രങ്ങൾ ഷൂട്ട് ചെയ്യാൻ ഉപയോഗിക്കുന്നതാണെന്നും നിവിൻ പോളി-ഹനീഫ് അദേനി ചിത്രത്തിനായി ഇതേ ക്യാമറയാണ് ഉപയോ​ഗിക്കുന്നതെന്നുമാണ് പുറത്തുവരുന്ന വിവരം.

ജനുവരി 20-ന് ആയിരുന്നു ഹനീഫ് അദേനി തിരക്കഥ എഴുതി സംവിധാനം ചെയ്യുന്ന ചിത്രത്തിന്റെ ഷൂട്ടിങ് യുഎഇയിൽ ആരംഭിച്ചത്. മാജിക് ഫ്രെയിംസും പോളി ജൂനിയർ പിക്ചേഴ്‌സും ചേർന്നാണ് ചിത്രം നിർമിക്കുന്നത്. പേരിടാത്ത ചിത്രം #NP42 എന്നാണ് അറിയപ്പെടുന്നത്. 'മിഖായേൽ' ന് ശേഷം നിവിൻ പോളിയും ഹനീഫ് അദേനിയും ഒരുമിക്കുന്ന ചിത്രം കൂടിയാണ് #NP42.

‌വിഷ്‍ണു തണ്ടാശ്ശേരിയാണ് ചിത്രത്തിന്റെ ഛായാഗ്രാഹണം. നിവിൻ പോളിക്ക് ഒപ്പം ജാഫർ ഇടുക്കി, വിനയ് ഫോർട്ട്, വിജിലേഷ്, മമിത ബൈജു, ആർഷ ബൈജു തുടങ്ങിയവരും ചിത്രത്തിൽ അഭിനയിക്കുന്നുണ്ട്. സന്തോഷ് രാമനാണ് ചിത്രത്തിന്റെ പ്രൊഡക്ഷൻ ഡിസൈൻ. മിഥുൻ മുകുന്ദന്റേതാണ് സം​ഗീതം. നിഷാദ് യൂസഫ് എഡിറ്റിങും ലിബിൻ മോഹനൻ മേക്കപ്പും മെൽവി ജെ കോസ്റ്റ്യൂമും ഒരുക്കുന്നു.