'പൊട്ടുന്ന കണ്ട് മോനെ എടുക്കാന്‍ വീട്ടിനകത്തേക്ക് ഓടി. പക്ഷെ ന്റെ കുട്ടീനെ എനിക്ക് കിട്ടീല്ല.' 13 വര്‍ഷത്തെ കാത്തിരിപ്പിനൊടുവിലാണ് പുത്തുമല സ്വദേശിയായിരുന്ന മുനീറയ്ക്ക് കുഞ്ഞ് ജനിച്ചത്. എന്നാല്‍ കണ്ട് കൊതി തീരും മുമ്പ് ആ കുഞ്ഞിനെ മലവെള്ളം കൊണ്ടുപോയി. പുത്തുമല ദുരന്തത്തില്‍ മരിക്കുമ്പോള്‍ മുനീറയുടെ കുഞ്ഞിന് മൂന്ന് വയസായിരുന്നു പ്രായം.
എസ്റ്റേറ്റ് ക്യാന്റീന്‍ തൊഴിലാളിയായിരുന്ന മുനീറയും ഭര്‍ത്താവും അന്ന് ഒഴുക്കില്‍പ്പെട്ടു. എന്നാല്‍ ഇരുവരെയും നാട്ടുകാര്‍ രക്ഷപ്പെടുത്തി. പുനരധിവാസ പദ്ധതിയില്‍ സ്വകാര്യ വ്യക്തി നല്‍കിയ ഭൂമിയില്‍ നിര്‍മ്മിച്ച വീട്ടിലാണ് മുനീറ ഇപ്പോള്‍ താമസം. എന്നാല്‍ നഷ്ടത്തിന്റെ നുറുങ്ങുന്ന വേദനയില്‍ നിന്ന് മുനീറ ഇനിയും മുക്തയായിട്ടില്ല .
