മനോജ് കെ ദാസ് ഏഷ്യാനെറ്റ് വിടുന്നു, മാതൃഭൂമി പത്രാധിപരായി ചുമതലയേൽക്കും
മാതൃഭൂമി ദിനപത്രത്തിന്റെ പത്രാധിപരായി മനോജ് കെ ദാസ് തിരികെയെത്തുന്നു. നിലവിൽ ഏഷ്യാനെറ്റ് ന്യൂസ് മാനേജിങ് എഡിറ്ററായി പ്രവർത്തിക്കുന്ന മനോജ് നവംബർ ഒന്നിന് പുതിയ ചുമതല ഏറ്റെടുക്കുമെന്ന് അറിയുന്നു. രാജിവച്ച പത്രാധിപരെ തിരികെ വിളിക്കുന്നത് മാതൃഭൂമി ദിനപത്രത്തിന്റെ ചരിത്രത്തിൽ ആദ്യമായാണ്.
മനോജ് കെ ദാസിന് പത്രാധിപരായി പുനർനിയമനം നൽകാനുള്ള ഡയറക്ടർ ബോർഡ് നിർദേശം സെപ്റ്റംബർ 27 ന് ചേർന്ന മാതൃഭൂമി പ്രിന്റിങ് ആൻഡ് പബ്ലിഷിങ് കമ്പനി ഓഹരി ഉടമകളുടെ യോഗം അംഗീകരിച്ചതായി തീരുമാനത്തെപ്പറ്റി അറിവുള്ള ഉന്നത വൃത്തങ്ങൾ സ്ഥിരീകരിച്ചു. ഔദ്യോഗിക പ്രഖ്യാപനം വരും ദിവസങ്ങളിലുണ്ടാകും.
ഏഷ്യാനെറ്റ് മാനേജിങ് എഡിറ്റർ ആകും മുൻപ് 2019 നവംബർ മുതൽ ഒന്നര വർഷത്തിലധികം മാതൃഭൂമി പത്രാധിപരായിരുന്നു മനോജ് കെ ദാസ്. പത്രത്തിന്റെ കെട്ടിലും മട്ടിലും പുത്തൻ പരീക്ഷണങ്ങൾ നടത്തിയ എഡിറ്റർ എന്ന നിലയിൽ അദ്ദേഹം ശ്രദ്ധ നേടി.
അൻപത്തിരണ്ടുകാരനായ മനോജ് കെ ദാസ് 1994 ല്‍ ന്യൂ ഇന്ത്യന്‍ എക്‌സ്‌പ്രസിലൂടെയാണ് മാധ്യമ പ്രവർത്തനം ആരംഭിക്കുന്നത്. എക്‌സ്‌പ്രസിന്റെ കൊച്ചി ബ്യൂറോ ചീഫ്, ഡെപ്യൂട്ടി റസിഡന്റ് എഡിറ്റര്‍, റസിഡന്റ് എഡിറ്റര്‍ പദവികള്‍ വഹിച്ചു. ഇടക്കാലത്ത് ഏഷ്യാനെറ്റ് ന്യൂസ് റസിഡന്റ് എഡിറ്റർ ആയി പ്രവർത്തിച്ച അദ്ദേഹം ഇംഗ്ലീഷ് ദിനപത്രങ്ങളായ ഡെക്കാന്‍ ക്രോണിക്കിളിന്‍റെയും ടൈംസ് ഓഫ് ഇന്ത്യയുടേയും കേരളത്തിലെ സ്ഥാപക റസിഡന്റ് എഡിറ്ററായും സേവനമനുഷ്ഠിച്ചിട്ടുണ്ട്.
കോട്ടയം കങ്ങഴ ഇടിയിരിക്കപ്പുഴ സ്വദേശിയാണ് മനോജ് കെ ദാസ്. ഭാര്യ: സരിത, മക്കൾ: മാനസ്, മഞ്ജീര.
