FOURTH SPECIAL
നിറങ്ങളിലലിഞ്ഞ് തിരുവനന്തപുരം; കളറായി ഓണാഘോഷം
'കളറായി' ഓണം ആഘോഷിക്കുകയാണ് തിരുവനന്തപുരം. നഗരം ഒട്ടാകെയുള്ള വൈദ്യുത ദീപാലങ്കാരത്തിന്റെ ഭംഗി ആസ്വദിക്കാന്‍ ആയിരക്കണക്കിന് ആളുകളാണ് കനകക്കുന്നിലും പരിസരങ്ങളിലും എത്തുന്നത്
മഹാമാരിക്കുശേഷം ഓണക്കാലത്തെ ആഘോഷപൂര്‍വം വരവേറ്റിരിക്കുകയാണ് മലയാളികള്‍. രണ്ടു വര്‍ഷത്തിനു ശേഷം തിരുവനന്തപുരം നഗരത്തിലെ ഓണവും 'കളറാണ്'. നഗരം ഒട്ടാകെ വൈദ്യുത ദീപാലങ്കാരമൊരുക്കി വര്‍ണവിസ്മയം തീര്‍ത്തിരിക്കുകയാണ്. നഷ്ടപ്പെട്ടുപോയ ആരവവും സന്തോഷവും തിരികെ പിടിക്കാന്‍ നിരവധി ആളുകളാണ് കനകക്കുന്നിലും പരിസരങ്ങളിലും എത്തുന്നത്. ഓരോരുത്തര്‍ക്കും പറയാനുള്ളത് നല്ല നാളുകളിലേക്ക് കടന്നതിന്റെ പ്രതീക്ഷയും അതിജീവനത്തിന്റെ ആത്മവിശ്വാസവുമായിരുന്നു. സംസ്ഥാന സര്‍ക്കാരിന്റെ നേതൃത്വത്തിലാണ് തലസ്ഥാനത്തെ ഓണാഘോഷ പരിപാടികള്‍. മുന്‍ വര്‍ഷങ്ങളില്‍ ഏഴ് ദിവസം നീണ്ടുനിന്നിരുന്ന ദീപാലങ്കാരം ഇത്തവണ 12 ദിവസമാണ്.
