'എല്ലാം ദൈവം നല്‍കിയത്...' കലോത്സവ വേദിയിലുണ്ട് കല്യാണ വീട്ടിലെ ആ വൈറല്‍ പാട്ടുകാരന്‍
കല്യാണ വീട്ടിലെ ആ വൈറല്‍ പാട്ടുകാരന്‍, സോഷ്യല്‍ മീഡിയ ഏറ്റെടുത്ത ആ കുട്ടിപ്പാട്ടുകാരന്‍ കൊല്ലത്തും ഹിറ്റാണ്. തൃശൂര്‍ കയ്പ്മംഗലം കൂരിക്കുഴി സ്വദേശി മതിലകത്ത് വീട്ടില്‍ നൂര്‍ദീന്‍ - ഷിജി ദമ്പതികളുടെ മകന്‍ അഹ്‌മദ് നജാദ് സംസ്ഥാന കലോത്സവത്തിലും മികവ് തെളിയിച്ചു കഴിഞ്ഞു.
ഉര്‍ദു ഗസല്‍, ഉര്‍ദു ഗ്രൂപ്പ് സോങ് തുടങ്ങിയ ഇനങ്ങളിലാണ് അഹമ്മദ് നജാദ് പങ്കെടുക്കുന്നത്. ഉര്‍ദു ഗസലില്‍ എ ഗ്രേഡും സ്വന്തമാക്കിക്കഴിഞ്ഞു ഈ കൊച്ചു മിടുക്കന്‍. തൃശൂര്‍ മതിലകം സെന്റ് ജോസഫ് മതിലകം സ്‌കൂളില്‍ എട്ടാം ക്ലാസ് വിദ്യാര്‍ത്ഥിയാണ് നിലവില്‍ നജാദ്.
ശാസ്ത്രീയമായി സംഗീതം അഭ്യസിക്കാതെയാണ് അഹമ്മദ് നജാദ് വേദികളും ആരാധകരുടെ മനസും കീഴടക്കുന്നത് എന്നതാണ് മറ്റൊരു പ്രത്യേകത. ശാസ്ത്രിയമായ പിന്തുണയില്ലാതെ എങ്ങനെ ഈ മാസ്മരിക പ്രകടനം എന്ന ചോദ്യത്തിന് ചെറു പുഞ്ചിരിയോടെ നജാദ് പറയും 'എല്ലാം ദൈവം നല്‍കിയ കഴിവ്, അതില്‍ വിശ്വസിച്ച് മുന്നോട്ട് പോവുന്നു എന്ന്.
വീണ്ടും അവന്‍ പാടി.....
'നിന്‍ മിഴികളിലൂറും സ്‌നേഹം
എന്‍ കനവില്‍ നിറയും മോഹം
നിന്‍ കൈകളില്‍ ചേരും നേരം
ഞാന്‍ പനിനീര്‍ മലരാകും'
