അസമിലെ ജയിലിലേയ്ക്ക് മാറ്റണം; സുപ്രീംകോടതിയെ സമീപിച്ച് ജിഷ വധക്കേസിലെ പ്രതി അമീറുല്‍ ഇസ്ലാം
ജയില്‍ മാറ്റമാവശ്യപ്പെട്ട് പെരുമ്പാവൂര്‍ ജിഷാ വധക്കേസിലെ പ്രതി അമീറുല്‍ ഇസ്ലാം സുപ്രീംകോടതിയെ സമീപിച്ചു. കേരളത്തിലെ ജയിലില്‍ നിന്ന് അസമിലേക്ക് മാറ്റണമെന്നാണ് ഹര്‍ജിയിലെ ആവശ്യം. കുടുംബം കടുത്ത ദാരിദ്ര്യത്തിലാണ്. വിയ്യൂരിലെ ജയിലിലെത്തി അവർക്ക് കാണാന്‍ സാധിക്കുന്നില്ലെന്നും ഹര്‍ജിയില്‍ വ്യക്തമാക്കിയിട്ടുണ്ട്.
നിയമ വിദ്യാര്‍ത്ഥിനിയായ ജിഷയെ ബലാത്സംഗം ചെയ്ത് കൊലപ്പെടുത്തിയ കേസില്‍ വിചാരണ കോടതി അമീറുല്‍ ഇസ്ലാമിന് വധശിക്ഷ വിധിച്ചിരുന്നു. ഇതിനെതിരെ ഹൈക്കോടതിയില്‍ ഹര്‍ജി നല്‍കിയിട്ടുണ്ട്. ഹൈക്കോടതി വധശിക്ഷ ശരിവയ്ക്കാത്ത സാഹചര്യത്തില്‍ മറ്റ് തടവുകാർക്കുള്ള എല്ലാ അവകാശങ്ങളും തനിക്കുമുണ്ടെന്ന് ചൂണ്ടിക്കാട്ടിയാണ് അമീറുള്‍ സുപ്രീം കോടതിയെ സമീപിച്ചിരിക്കുന്നത്. നേരത്തെ ഈ ആവശ്യമുന്നയിച്ച് അമീറുള്‍ ഗവര്‍ണറെയും സമീപിച്ചിരുന്നു.
2016 ഏപ്രില്‍ 28- നാണ് ജിഷയെ മരിച്ച നിലയില്‍ കണ്ടെത്തിയത്. അമീറുള്‍ ഇസ്ലാമാണ് കൊലപ്പെടുത്തിയതെന്നായിരുന്നു അന്വേഷണത്തിലെ കണ്ടെത്തല്‍. കൊലപാതകം, മാനഭംഗം തുടങ്ങി കുറ്റങ്ങള്‍ ചുമത്തിയ കേസില്‍ എറണാകുളം പ്രിന്‍സിപ്പല്‍ സെഷന്‍സ് കോടതി വധശിക്ഷ വിധിക്കുകയായിരുന്നു.
