സംസ്ഥാനത്ത് ശക്തമായ മഴ വരുന്നു ; ഒന്പത് ജില്ലകളില് യെല്ലോ അലര്ട്ട്
അടുത്ത 24 മണിക്കൂറിനുള്ളില് സംസ്ഥാനത്ത് ശക്തമായ മഴ പെയ്യുമെന്ന് കേന്ദ്ര കാലാവസ്ഥാ വകുപ്പ്. തുടര്ന്ന് ഒന്പത് ജില്ലകളില് യെല്ലോ അലേര്ട്ട് പ്രഖ്യാപിച്ചു. തിരുവനന്തപുരം കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, കോഴിക്കോട് ജില്ലകളിലാണ് യെല്ലോ അലര്ട്ട് പ്രഖ്യാപിച്ചത്. നാളെ ആലപ്പുഴ , എറണാകുളം ,തൃശൂര് , കോഴിക്കോട് കണ്ണൂര് ജില്ലകളിലും യെല്ലോ അലേര്ട്ട് പ്രഖ്യാപിച്ചിട്ടുണ്ട്.
അതിശക്തമായ ബിപോർജോയ് ചുഴലിക്കാറ്റ് ഗുജറാത്ത് തീരത്തേക്ക് നീങ്ങുന്ന പശ്ചാത്തലത്തിലാണ് കേരളത്തില് മഴ കനക്കുക. 24 മണിക്കൂറിനുള്ളില് 64.5 മില്ലിമീറ്റർ മുതല് 115.5 മില്ലിമീറ്റര് വരെ മഴ പെയ്യുമെന്നാണ് റിപ്പോര്ട്ട്. മധ്യകിഴക്കൻ അറബിക്കടലിനു മുകളിലുള്ള അതിശക്തമായ ബിപോർജോയ് ചുഴലിക്കാറ്റ് ജൂൺ 14 രാവിലെ വരെ വടക്ക് ദിശയിയിൽ സഞ്ചരിക്കും.
ചുഴലിക്കാറ്റിനെ തുടര്ന്ന് കേരള-കര്ണാടക, ലക്ഷദ്വീപ് തീരങ്ങളില് മത്സ്യബന്ധനത്തിന് പോകാന് പാടില്ലെന്നും കാലാവസ്ഥാ വകുപ്പ് അറിയിച്ചു. 11 മുതല് 15 വരെയുള്ള ദിവസങ്ങളില് കേരള കര്ണാടക ലക്ഷദ്വീപ് തീരങ്ങളില് മണിക്കൂറില് 55 കിലോമീറ്റര് വരെ വേഗതയില് കാറ്റ് വീശാന് സാധ്യതയുണ്ടെന്നും കേന്ദ്ര കാലാവസ്ഥാവകുപ്പ് അറിയിച്ചു. ആഴക്കടലിലേക്ക് മത്സ്യ ബന്ധനത്തിന് പോയ തൊഴിലാളികളോട് ഉടന് മടങ്ങി വരാനും നിര്ദേശിച്ചിരുന്നു.