ഗഡുക്കളായി ശമ്പളം: അംഗീകരിക്കാതെ ഒരു വിഭാഗം തൊഴിലാളികള്‍; കെഎസ്ആർടിസി വീണ്ടും പണിമുടക്കിലേക്ക്
കെഎസ്ആർടിസിയില്‍ ശമ്പളം ഗഡുക്കളായി നല്‍കുന്നതില്‍ എതിര്‍പ്പ് തുടര്‍ന്ന് തൊഴിലാളികള്‍. വിഷയം ചര്‍ച്ച ചെയ്യാന്‍ ഗതാഗത മന്ത്രി ആന്റണി രാജു ഇന്ന് വിളിച്ച യോഗത്തിലും തൊഴിലാളി സംഘടനകള്‍ നിലപാടില്‍ ഉറച്ചു നിന്നു. ബിഎംഎസ്, ടിഡിഎസ് സംഘടനകളാണ് തീരുമാനം അംഗീകരിക്കില്ലെന്ന് വ്യക്തമാക്കിയത്. നിലപാടില്‍ നിന്ന് പിന്നോട്ടില്ലെന്ന് സര്‍ക്കാര്‍ വ്യക്തമാക്കിയതോടെ തൊഴിലാളികള്‍ വീണ്ടും പണിമുടക്കിലേക്ക് തിരിയുമെന്നാണ് സംഘടനകളുടെ നിലപാട്.
സര്‍ക്കാര്‍ നിലപാടില്‍ പ്രതിഷേധിച്ച് പണിമുടക്ക് നോട്ടീസ് സര്‍ക്കാരിന് നല്‍കിയെന്ന് കെഎസ്ആര്‍ടി എംപ്ലോയീസ് സംഘ്
സര്‍ക്കാര്‍ നിലപാടില്‍ പ്രതിഷേധിച്ച് പണിമുടക്ക് നോട്ടീസ് സര്‍ക്കാരിന് നല്‍കിയെന്ന് കെഎസ്ആര്‍ടി എംപ്ലോയീസ് സംഘ് പ്രസിഡന്റ് ജികെ അജിത്ത് വ്യക്തമാക്കി. ഞായറാഴ്ച പണിമുടക്ക് തീയതി പ്രഖ്യാപിക്കും. കോര്‍പ്പറേഷന് വരുമാനം ഉറപ്പാക്കിയിട്ടും ശമ്പളം നല്‍കുന്നില്ലെന്നും യൂണിയന്‍ ആരോപിച്ചു. ജീവനക്കാരുടെ പെന്‍ഷന്റെ കാര്യത്തിലും യൂണിയന്‍ ആവശ്യങ്ങള്‍ അംഗീകരിക്കണം. കെഎസ്ആര്‍ടിസിയുമായി ബന്ധപ്പെട്ട് ഇത്തരത്തില്‍ അടുക്കള ചര്‍ച്ചകള്‍ നടത്തുന്നത് തന്നെ ശരിയായ രീതിയല്ലെന്നും യൂണിയന്‍ കുറ്റപ്പെടുത്തി. അംഗീകൃത യൂണിയനുകളെ ഒറ്റയ്ക്ക് ചര്‍ച്ചയ്ക്ക് വിളിക്കുന്നത് ശരിയല്ലെന്നും അങ്ങനെ വിളിച്ചാല്‍ ഇനിമുതല്‍ സഹകരിക്കില്ലെന്നും യൂണിയന്‍ വ്യക്തമാക്കി.
തിങ്കളാഴ്ചയായിരുന്നു സിഐടിയുവുമായി ഗതാഗത മന്ത്രി ചര്‍ച്ച നടത്തിയത്
തിങ്കളാഴ്ചയായിരുന്നു സിഐടിയുവുമായി ഗതാഗത മന്ത്രി ചര്‍ച്ച നടത്തിയത്. ഇന്ന് ഉച്ചയ്ക്ക് 12.30ന് ബിഎംഎസ് യൂണിയനുമായും ഒന്നരയ്ക്ക് കോണ്‍ഗ്രസ് അനുകൂല സംഘടനയായ ടിഡിഎഫുമായും ചര്‍ച്ച നടന്നു. ചര്‍ച്ചകളെല്ലാം പരാജയമാണെന്നാണ് സംഘടനകളുടെ നിലപാട്. എന്നാല്‍ മന്ത്രിയുമായി കഴിഞ്ഞ ദിവസം നടത്തിയ ചര്‍ച്ചയെ തുടര്‍ന്ന് തല്‍ക്കാലം സമരത്തിന് ഇല്ലെന്നാണ് സിഐടിയുവിന്റെ നിലപാട്.
ജീവനക്കാരുടെയും യൂണിയനുകളുടെയും ശക്തമായ പ്രതിഷേധം നിലനില്‍ക്കുന്ന സാഹചര്യത്തിലും ഈ മാസം ഗഡുക്കളായാണ് കെഎസ്ആര്‍ടിസി നല്‍കിയത്. തൊഴിലാളികള്‍ക്ക് താത്പര്യമില്ലെങ്കിലും ശമ്പളം ഗഡുക്കളായി തന്നെ നല്‍കുമെന്ന തീരുമാനത്തില്‍ ഉറച്ചു നില്‍ക്കുകയാണ് സര്‍ക്കാര്‍.
