സര്‍ക്കാര്‍ ജീവനക്കാര്‍ക്ക് 4000 രൂപ ഓണം ബോണസ്, ഉത്സവബത്ത 2,750 രൂപ
ഓണം പ്രമാണിച്ച് സർക്കാർ ജീവനക്കാർക്ക് ബോണസായി 4,000 രൂപയും ബോണസിന് അർഹത ഇല്ലാത്തവർക്ക് ഉത്സവബത്തയായി 2,750 രൂപയും നൽകുമെന്ന് ധനമന്ത്രി കെ എൻ ബാലഗോപാൽ. സർവീസ് പെൻഷൻകാർക്കും പങ്കാളിത്ത പെൻഷൻ പദ്ധതി പ്രകാരം വിരമിച്ച ജീവനക്കാർക്കും പ്രത്യേക ഉത്സവബത്തയായി 1,000 രൂപ നൽകുമെന്നും മന്ത്രി അറിയിച്ചു.
സംസ്ഥാനത്തെ എല്ലാ സർക്കാർ ജീവനക്കാർക്കും ഓണം അഡ്വാൻസായി 20,000 രൂപയും പാർട്ട്‌ ടൈം - കണ്ടിൻജന്റ് ഉൾപ്പെടെയുള്ള മറ്റ് ജീവനക്കാർക്ക് 6,000 രൂപയും അനുവദിച്ചു.
കഴിഞ്ഞവർഷം ഉത്സവബത്ത ലഭിച്ച കരാർ - സ്കീം തൊഴിലാളികൾ ഉൾപ്പെടെ എല്ലാ വിഭാഗം ജീവനക്കാർക്കും അതേ നിരക്കിൽ തന്നെ ഈ വർഷവും ഉത്സവ ബത്ത ലഭിക്കും. 13 ലക്ഷത്തിലധികം സര്‍ക്കാര്‍ ജീവനക്കാര്‍ക്കും തൊഴിലാളികള്‍ക്കുമാണ് ഈ പ്രഖ്യാപനങ്ങളുടെ ഗുണം ലഭിക്കുക.
രണ്ട് മാസത്തെ ക്ഷേമ പെന്‍ഷന്‍ കുടിശ്ശികയുടെ വിതരണവും തിങ്കളാഴ്ച ആരംഭിച്ചു. 60 ലക്ഷത്തോളം ആളുകള്‍ക്കാണ് 3,200 രൂപ വീതം ലഭിക്കുക. ഇതിനായി 1,762 കോടി രൂപ സര്‍ക്കാര്‍ അനുവദിക്കുകയും 23ന് മുന്‍പ് തന്നെ ക്ഷേമ പെന്‍ഷന്‍ വിതരണം പൂര്‍ത്തിയാക്കാനും തീരുമാനമാകുകയും ചെയ്തിരുന്നു.
