മലേഷ്യ മാസ്‌റ്റേഴ്‌സ് ബാഡ്മിന്റണ്‍ പിവി സിന്ധു പുറത്ത്

മലേഷ്യ മാസ്‌റ്റേഴ്‌സ് ബാഡ്മിന്റണ്‍ 2023 വനിതാ സിംഗിള്‍സില്‍ പിവി സിന്ധു പുറത്ത്. സെമി ഫൈനലില്‍ ഇന്തോനേഷ്യയുടെ ഗ്രിഗോറിയ മരിസ്‌ക ടുന്‍ജംഗ് ആണ് സിന്ധുവിനെ പരാജയപ്പെടുത്തിയത്. 21-14, 21-17 എന്ന സ്‌കോറിനാണ് ലോക ഒന്‍പതാം റാങ്കുകാരിയുടെ ജയം.

ആദ്യ സെറ്റില്‍ സിന്ധുവിന് മികച്ച തുടക്കം ലഭിച്ചെങ്കിലും ടുന്‍ജംഗ് വളരെ വേഗം തന്നെ മേല്‍ക്കൈ നേടുകയായിരുന്നു. പിന്നീട് ഇരുവരും ഒപ്പത്തിനൊപ്പമായിരുന്നു. എന്നാല്‍ സ്ഥിരത നിലനിര്‍ത്താന്‍ സിന്ധുവിന് കഴിയാതെ വന്നതോടെ ടുന്‍ജംഗ് 1-0 ന് മുന്നിലെത്തി. രണ്ടാം സെറ്റിലും ഇത് തന്നെയായിരുന്നു അവസ്ഥ, അധികം വൈകാതെ ടുന്‍ജംഗ് ലീഡ് നേടി. 16-11 ലേക്ക് ലീഡുയര്‍ത്തി അവര്‍ സിന്ധുവിനെ പിടിച്ചുകെട്ടി. സിന്ധു അവസാനം തിരിച്ചു വരവിന് ശ്രമിച്ചെങ്കിലും സാധിച്ചില്ല, രണ്ടാം സെറ്റും ടുന്‍ജംഗ് സ്വന്തമാക്കി.

കഴിഞ്ഞ മാസം മാഡ്രിഡ് മാസ്റ്റേഴ്‌സ് ഓപ്പണ്‍ ഫൈനലിലും സിന്ധു ടുന്‍ജംഗിനോട് തോറ്റിരുന്നു. പുരുഷ സെമിയില്‍ എച്ച് എസ് പ്രണോയ് ഇന്തോനേഷ്യയുടെ ക്രിസ്റ്റ്യന്‍ ആദിനാറ്റയെ നേരിടുകയാണ്.