ഇന്തോനേഷ്യ മാസ്‌റ്റേഴ്‌സ്: മലയാളി താരത്തിന് അഭിമാന നേട്ടം, കിരീടം നേടി കിരണ്‍ ജോര്‍ജ്

ഇന്തോനീഷ്യ മാസ്‌റ്റേഴ്‌സ് ബാഡ്മിന്റണില്‍ കിരീടം ചൂടി ഇന്ത്യയുടെ മലയാളി താരം കിരണ്‍ ജോര്‍ജ്. ഇന്നു നടന്ന ഫൈനലില്‍ ജപ്പാന്റെ കു തകഹാഷിയെ നേരിട്ടുള്ള ഗെയിമുകള്‍ക്കു തോല്‍പിച്ചായിരുന്നു കിരണിന്റെ ജയം. സ്‌കോര്‍ 21-19, 22-20. കിരണിന്റെ രണ്ടാമത്തെ ലോക ബാന്റ്മിന്റണ്‍ ചാമ്പ്യന്‍ഷിപ്പ് കിരീടമാണിത്. കഴിഞ്ഞ വര്‍ഷം ഒഡീഷ ഓപ്പണ്‍ ഫൈനലില്‍ ഇന്ത്യയുടെ തന്നെ പ്രിയാന്‍ഷു റാവത്തിനെ പരാജയപ്പെടുത്തിയായിരുന്നു കിരണ്‍ ആദ്യ കിരീടം സ്വന്തമാക്കിയത്.

ഫൈനലില്‍ ഇഞ്ചോടിഞ്ചു പോരാട്ടമായിരുന്നു കിരണും ജപ്പാന്‍ താരവും പുറത്തെടുത്തത്. ആദ്യ ഗെയിമില്‍ 15-15 എന്ന നിലയില്‍ ഒപ്പത്തിനൊപ്പം നിന്ന ശേഷം മികച്ച പ്രകടനം പുറത്തെടുത്ത കിരണ്‍ തകയാഷിയെ നിഷ്പ്രഭനാക്കുകയായിരുന്നു. പിന്നീട് പിറന്ന 10 പോയിന്റുകളില്‍ ആറും സ്വന്തമാക്കിയ കിരണ്‍ 21-19 എന്ന സ്‌കോറില്‍ ആദ്യ ഗെയിം സ്വന്തമാക്കി.

രണ്ടാം ഗെയിമിലും സമാനതുടക്കമായിരുന്നു ഇരുവരുടേതും. തുടക്കത്തില്‍ 6-6 എന്ന നിലയില്‍ ഒപ്പത്തിനൊപ്പം നിന്ന ശേഷം ഇന്ത്യന്‍ താരം തുടരെ പോയിന്റുകള്‍ നേടി സ്‌കോര്‍ 16-11ല്‍ എത്തിച്ചു. എന്നാല്‍ തകാഹാഷി വിട്ടുകൊടുക്കാന്‍ തയാറല്ലായിരുന്നു. ഗംഭീരമായി തിരിച്ചടിച്ച ജപ്പാന്‍ താരം ഗെയിം ടൈബ്രേക്കറിലേക്ക് നീട്ടി. എന്നാല്‍ പതറാതെ പൊരുതിയ കിരണ്‍ ടൈബ്രേക്കര്‍ ജയിച്ച് ഗെയിമും മത്സരവും കിരീടവും സ്വന്തമാക്കുകയായിരുന്നു.

കഴിഞ്ഞ ദിവസം നടന്ന സെമിയില്‍ 2014ലെ ലോക ചാമ്പ്യന്‍ഷിപ്പിലെ വെങ്കല മെഡല്‍ ജേതാവായ ഇന്തോനഷ്യന്‍ താരം ടോമി സുഗിയാര്‍ട്ടോയെ പരാജയപ്പെടുത്തിയാണ് കിരണ്‍ ഫൈനലിലെ തന്റെ സ്ഥാനം ഉറപ്പിച്ചത്.