ചാറ്റ് ജിപിടിക്കും ബാര്‍ഡിനും വെല്ലുവിളിയാകാൻ ആലിബാബയുടെ ടോങ്കി ക്വിയാൻവെൻ
ചൈനീസ് ടെക് ഭീമനായ ആലിബാബയുടെ ക്ലൗഡ് കംപ്യൂട്ടിങ് സംവിധാനമായ അലിബാബ ക്ലൗഡ്, ചാറ്റ്ജിപിടി മാതൃകയിൽ പുതിയ എ ഐ ചാറ്റ്ബോട്ടുമായെത്തുന്നു. ടോങ്കി ക്വിയാൻവെൻ എന്ന് പേരിട്ടിരിക്കുന്ന ചാറ്റ്ബോട്ട് മോഡൽ സമീപ ഭാവിയിൽ ആലിബാബയുടെ എല്ലാ ഉത്പന്നങ്ങളുമായും സേവനങ്ങളുമായും സംയോജിപ്പിക്കുമെന്ന് ചീഫ് എക്സിക്യൂട്ടീവ് ഓഫീസർ ഡാനിയൽ ഷാങ് പറഞ്ഞു. പുതിയ AI മോഡൽ കമ്പനിയുടെ തന്നെ DingTalk ആപ്പുമായും, സ്മാർട്ട് ഹോം അപ്ലയൻസ് പ്രൊവൈഡറായ Tmall Genie യുമായും സംയോജിപ്പിക്കും. ചൊവ്വാഴ്ച ബീജിങിൽ നടന്ന കമ്പനിയുടെ ടെക് ഉച്ചകോടിയിലാണ് മോഡൽ പുറത്തിറക്കിയത്. ഈ വർഷമാദ്യം, ചാറ്റ്ജിപിടിയുടെ എതിരാളിയെ പുറത്തിറക്കുമെന്ന് ആലിബാബ പ്രഖ്യാപിച്ചിരുന്നു. ലോകമെമ്പാടുമുള്ള ടെക്‌നോളജി കമ്പനികൾ അവരുടേതായ ജനറേറ്റീവ് AI ചാറ്റ്ബോട്ടുകൾ സമീപ മാസങ്ങളിൽ, അവതരിപ്പിച്ചിരുന്നു.
ഇംഗ്ലീഷ്, ചൈനീസ് ഭാഷകളിൽ ടോങ്കി ക്വിയാൻവെൻ ലഭ്യമാകും. വിവിധ AI മോഡലുകളെ ഏകീകരിക്കുന്ന ആലിബാബയുടെ പ്രൊപ്രൈറ്ററി പ്രീ-ട്രെയിൻഡ് മോഡൽ ചട്ടക്കൂടായ Tongyi അടിസ്ഥാനമാക്കിയുള്ളതാണ് Tongyi Qianwen. മീറ്റിംഗുകളിലെ സംഭാഷണങ്ങൾ രേഖാമൂലമുള്ള കുറിപ്പുകളാക്കി മാറ്റുക, ഇ മെയിലുകൾ തയ്യാറാക്കുക, ബിസിനസ് നോട്സ് തയ്യാറാക്കുക തുടങ്ങി നിരവധി ജോലികൾ ഇത് നിർവഹിക്കുമെന്ന് കമ്പനി അവകാശപ്പെട്ടു.
സമീപഭാവിയിൽ ഉപയോക്തൃ അനുഭവം മെച്ചപ്പെടുത്തുന്നതിനായി പുതിയ AI മോഡൽ അലിബാബയുടെ വിവിധ ബിസിനസ്സുകളിലുടനീളം സംയോജിപ്പിക്കും. കമ്പനിയുടെ ഉപഭോക്താക്കൾക്കും ഡെവലപ്പർമാർക്കും ചെലവ് കുറഞ്ഞ രീതിയിൽ ഇഷ്‌ടാനുസൃതം AI സവിശേഷതകൾ സൃഷ്‌ടിക്കാൻ മോഡലിലേക്ക് ആക്സസ് ഉണ്ടായിരിക്കുമെന്നും കമ്പനി അറിയിച്ചു. അലിബാബ ക്ലൗഡിന്റെ ചൈനയിലെ ഉപഭോക്താക്കൾക്ക് ബീറ്റ പരിശോധനയ്ക്കായി Tongyi Qianwen ആക്സസ് ചെയ്യാൻ കഴിയും. കൂടുതൽ ശ്രദ്ധേയമായ AI സവിശേഷതകൾ ഉടൻ തന്നെ ടോങ്കി ക്വിയാൻവെൻ മോഡലിൽ ചേർക്കുമെന്നും കമ്പനി അറിയിച്ചു.
നവംബറിൽ മൈക്രോസോഫ്റ്റ് പിന്തുണയുള്ള OpenAI ചാറ്റ്ജിപിടി പുറത്തിറക്കിയതിന് ശേഷം ജനറേറ്റീവ് എഐയിൽ താത്പര്യം വർദ്ധിച്ചിട്ടുണ്ട്. ഏത് ഭാഷയിൽ നിന്ന് നിർദേശങ്ങൾ ലഭിച്ചാലും ഉള്ളടക്കം വികസിപ്പിക്കാനുള്ള കഴിവ് ചാറ്റ് ജിപിടിക്കുണ്ട്. ഭാഷാധിഷ്ഠിത നിർമിത ബുദ്ധിയുടെ കഴിവുകളെ ബിങില്‍ സമന്വയിപ്പിക്കുന്നതിനായി കോടിക്കണക്കിന് ഡോളറാണ് മൈക്രോസോഫ്റ്റ് ചെലവഴിച്ചത്. Word, Excel, PowerPoint, Outlook എന്നിവയുൾപ്പെടെയുള്ള ഓഫീസ് ആപ്പുകളിൽ ChatGPT യുടെ ഒരു പതിപ്പ് ഉൾപ്പെടുത്തുമെന്നും യുഎസ് സോഫ്റ്റ്‌വെയർ ഭീമൻ അറിയിച്ചിരുന്നു. ആൽഫബെറ്റിന്റെ ഗൂഗിളും ചൈനീസ് ടെക്‌നോളജി ഗ്രൂപ്പായ Baidu ഉം അവരുടെ സ്വന്തം AI മോഡലുകൾ പ്രഖ്യാപിക്കുകയും സമാനമായ ചാറ്റ്ബോട്ടുകൾ പുറത്തിറക്കുകയും ചെയ്തിട്ടുണ്ട്.
അതേസമയം, ചൊവ്വാഴ്ച, ചൈനയുടെ സൈബർസ്പേസ് റെഗുലേറ്റർ ജനറേറ്റീവ് AI കൈകാര്യം ചെയ്യുന്നതിനുള്ള കരട് നിയമാവലി പുറത്തിറക്കി. നിർദ്ദിഷ്ട നിയമങ്ങൾ അനുസരിച്ച്, സാങ്കേതികവിദ്യയെ പരിശീലിപ്പിക്കാൻ ഉപയോഗിക്കുന്ന ഡാറ്റയുടെ നിയമസാധുതയ്ക്ക് കമ്പനികൾ ഉത്തരവാദികളായിരിക്കുമെന്ന് ചൈനയിലെ സൈബർസ്പേസ് അഡ്മിനിസ്ട്രേഷൻ പറഞ്ഞു. നിർദ്ദേശങ്ങളിൽ പൊതുജനങ്ങൾക്ക് അഭിപ്രായം അറിയിക്കാൻ മെയ് 10 വരെ സമയം നൽകിയിട്ടുണ്ട്.
ടെക് ലോകത്തെ വിപ്ലവമായിരുന്നു ഓപ്പണ്‍ എഐയുടെ ഭാഷാ ചാറ്റ്ബോട്ട് ആയ ചാറ്റ് ജിപിടി. മൈക്രോസോഫ്റ്റാണ് പൂര്‍ണമായും നിര്‍മിത ബുദ്ധിക്കടിസ്ഥാനമായി പ്രവര്‍ത്തിക്കുന്ന ചാറ്റ് ജിപിടിയെന്ന ചാറ്റ് ബോട്ടിനെ ലോകത്തിന് പരിചയപ്പെടുത്തിയത്. ഗൂഗിളിന് വെല്ലുവിളിയാകും ചാറ്റ് ജിപിടി എന്ന നിരീക്ഷണം വന്നതോടെ ബാര്‍ഡിലൂടെ ചാറ്റ് ജിപിടിക്ക് ചെക്ക് വിളിക്കുകയായിരുന്നു ഗൂഗിള്‍. എന്നാല്‍ ചാറ്റ് ജിപിടിയുടെ ഉപയോഗം പല രാജ്യങ്ങളും ഇതിനോടകം തന്നെ വിലക്കിയിട്ടുണ്ട്. തെറ്റായ വിവരങ്ങള്‍ നല്‍കുന്നു എന്ന കാരണം ചൂണ്ടിക്കാട്ടി ചാറ്റ് ജിപിടിയെ ചൈനയും വിലക്കിയിരുന്നു.
