'സ്വന്തം റെക്കോർഡ് തകർത്ത് കാമി റീത്ത ഷെര്‍പ്പ'; 27-ാം തവണയും എവറസ്റ്റ് കീഴടക്കി

ലോകത്തിലെ ഏറ്റവും ഉയരം കൂടിയ കൊടുമുടി ഏറ്റവും കൂടുതൽ തവണ കീഴടക്കി സ്വന്തം റെക്കോഡ് തിരുത്തി നേപ്പാള്‍ സ്വദേശി. നേപ്പാളി പർവതാരോഹകൻ കാമി റീത്ത ഷെർപ്പ ഇത് 27-ാം തവണയാണ് എവറസ്റ്റ് കൊടുമുടി കീഴടക്കുന്നത്. ഇതോടെ ഈ നേട്ടം കൈവരിക്കുന്ന രണ്ടാമത്തെ വ്യക്തി എന്ന പദവിയാണ് കാമി റീത്ത സ്വന്തമാക്കിയത്. 53 കാരനായ കാമി റീത്തയടക്കമുള്ള 11 ഷെര്‍പ്പ ​ഗൈഡുകളാണ് ശനിയാഴ്ച എവറസ്റ്റിന്റെ 8848.86 മീറ്റര്‍ ഉയരം കീഴടക്കിയത്.

“ഒരു വിയറ്റ്നാമീസ് പർവതാരോഹകനെ നയിച്ചുകൊണ്ട് ഇന്ന് രാവിലെ അദ്ദേഹം വിജയകരമായി ദൗത്യം പൂർത്തിയാക്കി”-കാമി റീത്തയുടെ പര്യവേഷണ സംഘാടകനായ സെവൻ സമ്മിറ്റ് ട്രെക്‌സിലെ മിംഗ്മ ഷെർപ്പ മാധ്യമങ്ങളോട് പറഞ്ഞു. ”എവറസ്റ്റ് മനുഷ്യന്‍” എന്നറിയപ്പെടുന്ന കാമി റീത്ത 1994ലാണ് ആദ്യമായി എവറസ്റ്റ് കീഴടക്കുന്നത്. അതിനുശേഷം 2014, 2015, 2020 വർഷങ്ങളിൽ വിവിധ കാരണങ്ങളാൽ മലകയറ്റം നിർത്തിവച്ചത് ഒഴികെ എല്ലാ വർഷവും അത് തുടർന്നു. എന്നാൽ ഞായറാഴ്ച മറ്റൊരു പർവതാരോഹകൻ പസാങ് ദവ ഷെർപ്പ (46) 26-ാം തവണയും ഒന്നാമതെത്തി റെക്കോർഡ് സ്വന്തമാക്കി.

പർവതാരോഹകരുടെ കേന്ദ്രമായി അറിയപ്പെടുന്ന ഹിമാലയത്തിലെ താമിൽ 1970ലാണ് കാമി റീത്ത ജനിച്ചത്. വലിയ കൊടുമുടികള്‍ കയറുന്നതില്‍ അഗ്രഗണ്യരാണ് ഷെര്‍പ്പ വിഭാഗത്തിലുള്ളവര്‍. കാമി റീത്തയുടെ അച്ഛനും സഹോദരനും പർവതാരോഹകരായിരുന്നു. രണ്ട് പതിറ്റാണ്ടിലേറെയായി ഗൈഡായി പ്രവർത്തിക്കുകയാണ് കാമി റീത്ത ഷെർപ്പ. 1994-ൽ ഒരു വാണിജ്യ പര്യവേഷണത്തിനായി പ്രവർത്തിക്കുമ്പോഴാണ് ആദ്യമായി കാമി റീത്ത എവറസ്റ്റ് കീഴടക്കുന്നത്. ഈ റെക്കോർഡുകളെല്ലാം താൻ മനഃപൂർവം സൃഷ്ടിച്ചതല്ലെന്നും മറിച്ച് ഗൈഡായി ജോലി ചെയ്യുന്നതിനിടെ സംഭവിച്ചതാണെന്നും ഷെർപ്പ കഴിഞ്ഞ മാസം ബേസ് ക്യാമ്പിലേക്ക് പോകുമ്പോൾ AFP യോട് പറഞ്ഞു.

ലോകത്തിലെ ഏറ്റവും ഉയരമുള്ള 10 കൊടുമുടികളില്‍ എട്ടെണ്ണവും നേപ്പാളിലാണ് സ്ഥിതി ചെയ്യുന്നത്. ഓരോ വസന്തകാലത്തും താപനില ചൂടുള്ളതും കാറ്റ് സാധാരണയായി ശാന്തവുമാകുമ്പോൾ നൂറുകണക്കിന് സാഹസികരാണ് ഇങ്ങോട്ടേക്കെത്തുന്നത്. ഈ വര്‍ഷം 478 വിദേശ പര്‍വതാരോഹകര്‍ക്ക് അധികാരികള്‍ പെര്‍മിറ്റുകള്‍ നല്‍കിയിട്ടുണ്ട്. മിക്കവര്‍ക്കും ഒരു ഗൈഡ് ആവശ്യമുള്ളതിനാല്‍, 900-ലധികം ആളുകള്‍ പര്‍വതാരോഹണം നടത്തും.