വൈറ്റ് ഹൗസിൽ പ്രൈഡ് ആഘോഷത്തിനിടെ അർധ നഗ്നയായി പ്രത്യക്ഷപ്പെട്ട് ട്രാൻസ് ആക്ടിവിസ്റ്റ്; വൈറലായി വീഡിയോ

അമേരിക്കയിൽ പ്രൈഡ് മാസത്തിലെ ആഘോഷങ്ങളിൽ പ്രസിഡന്റ് ജോ ബൈഡന് മുൻപിൽ അർധ നഗ്നയായി പ്രത്യക്ഷപ്പെട്ട് ട്രാൻസ് ആക്ടിവിസ്റ്റ്. യുവതിയുടെ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലാവുകയാണ്. ട്രാൻസ് ആക്ടിവിസ്റ്റായ റോസ് മോണ്ടോയയുടെ ദൃശ്യങ്ങളാണ് പ്രചരിക്കുന്നത്. വൈറ്റ് ഹൗസിൽ നടന്ന ചടങ്ങിനിടെയുള്ള ദൃശ്യങ്ങൾ അവര്‍ തന്നെയാണ് ആദ്യം ടിക് ടോക്കിലൂടെ പങ്കുവച്ചത്.

ചടങ്ങിലെ വിവിധ ദൃശ്യങ്ങൾ കൂട്ടിച്ചേർത്ത് ഒറ്റ വീഡിയോ ആയാണ് റോസ് പങ്കുവച്ചിരിക്കുന്നത്. വീഡിയോയുടെ അവസാനഭാഗത്ത്, ധരിച്ചിരിക്കുന്ന വെളുത്തവസ്ത്രം അരയ്ക്ക് മുകളിൽ നിന്ന് നീക്കി റോസ് പ്രത്യക്ഷപ്പെടുന്നു. റോസിന്റെ സമീപം മറ്റൊരു എൽജിബിടിക്യു കമ്മ്യൂണിറ്റി അംഗത്തേയും കാണാം. സ്തനങ്ങൾ നീക്കം ചെയ്ത ഇവര്‍ക്ക് പിന്തുണ പ്രഖ്യാപിച്ചായിരുന്നു റോസിന്റെ പ്രവൃത്തിയെന്നാണ് സൂചന.

റോസ് യുഎസിന്റെ പ്രഥമ വനിത ജിൽ ബൈഡനുമായി സംസാരിക്കുന്നതും ശേഷം ജോ ബൈഡനുമായി ഹസ്തദാനം നടത്തുന്നതും വിഡിയോയിൽ കാണാം. "ട്രാൻസ് റൈറ്റ്സ് മനുഷ്യാവകാശമാണ്!" എന്നും യുവതി വീഡിയോയിൽ പറയുന്നു.

വീഡിയോ വൈറലായതോടെ ശക്തമായ വിമര്‍ശനങ്ങളാണ് ബൈഡനെതിരെ ഉയരുന്നത്. വിമർശനങ്ങളോട് വൈറ്റ് ഹൗസ് ഇതുവരെ പ്രതികരിച്ചിട്ടില്ല. എൽജിബിടിക്യു കമ്മ്യൂണിറ്റി താൻ ഇതുവരെ അറിഞ്ഞിട്ടുള്ളവരിൽ ഏറ്റവും ധീരരും പ്രചോദിപ്പിക്കുന്നവരുമാണെന്നാണ് പരിപാടിയിൽ ബൈഡൻ പറഞ്ഞിരുന്നു. ജൂൺ 10 നായിരുന്നു വൈറ്റ് ഹൗസിൽ പ്രൈഡ് മാസാഘോഷം സംഘടിപ്പിച്ചത്.