ആലപ്പുഴ കായംകുളത്ത് കാര്‍ ലോറിയുമായി കൂട്ടിയിടിച്ചുണ്ടായ അപകടത്തില്‍ ആഭ്യന്തര വകുപ്പ് സെക്രട്ടറി ഡോ. വി വേണുവിനും ഭാര്യയായ തദ്ദേശവകുപ്പ് സെക്രട്ടറി ശാരദ മുരളീധരനും പരുക്ക്. കുടുംബവുമൊത്ത് ഇവർ സഞ്ചരിച്ച ഔദ്യോഗിക വാഹനമാണ് അപകടത്തില്‍ പെട്ടത്.

അപകടത്തില്‍ ഏഴ് പേര്‍ക്ക് ഗുരുതരമായി പരുക്കേറ്റു. കെ വേണുവിന് പുറമെ ഭാര്യയും തദ്ദേശ വകുപ്പ് സെക്രട്ടറിയുമായ ശാരദ മുരളീധരന്‍, മകന്‍ ശബരി, കുടുംബ സുഹൃത്താക്കളായ പ്രണവ്, സൗരവ് എന്നിവരും ഡ്രൈവര്‍ അഭിലാഷുമാണ് വാഹനത്തില്‍ ഉണ്ടായിരുന്നത്. എറണാകുളത്ത് നിന്ന് തിരുവനന്തപുരത്തേക്ക് പോകുകയായിരുന്നു വാഹനം കായംകുളം കൊറ്റുകുളങ്ങരക്ക് സമീപം ലോറിയുമായി കൂട്ടിയിടിക്കുകയായിരുന്നു. പുലര്‍ച്ചെ ഒരു മണിയോടെ ആയിരുന്നു അപകടം. എറണാകുളത്തേക്ക് പോകുകയായിരുന്നു ലോറി.

പരുക്കേറ്റവർ പരുമല സെയിന്റ് ഗ്രിഗോറിയസ് ആശുപത്രി ഐസിയുവിൽ ചികിത്സയിലാണ്. ആരുടെയും ആരോഗ്യ നിലയില്‍ ആശങ്കപ്പെടേണ്ട സാഹചര്യമില്ലെന്നാണ് റിപ്പോര്‍ട്ടുകള്‍. ഡോ. വേണുവിന്റെ മൂക്കിലും നെറ്റിയിലും പൊട്ടലുണ്ട്. സീറ്റ് ബെൽറ്റ് മുറുകി വയറിനു കീഴെ പരുക്കും. ഇടിയുടെ ആഘാതത്തിൽ രണ്ടു പല്ലുകൾ നഷ്ടമായി.

ശാരദാ മുരളീധരന് കാലിൽ പരുക്കുണ്ട്. സീറ്റ് ബെൽറ്റ് മുറുകിയ കാരണമുള്ള ചതവും. മുഖത്ത് മുറിവുകളോടെയാണ് മകൻ ശബരിയെ ആശുപത്രിയിൽ പ്രവേശിപ്പിച്ചിരിക്കുന്നത്. ഡ്രൈവർ അഭിലാഷിനും നെറ്റിയിലാണ് പരുക്ക്.