തിരുവനന്തപുരത്ത് എംഡിഎംഎ കേസില്‍ എക്‌സൈസ് പിടികൂടിയ യുവാവിന്റെ മാതാവ് ആത്മഹത്യ ചെയ്തു. ശാന്തിപുരം ഷൈനി കോട്ടേജില്‍ ഗ്രേസി ക്ലമന്റ് (55) ആണ് തൂങ്ങിമരിച്ചത്. മകന്‍ ഷൈനോ ക്ലമന്റിനെ 0.4ഗ്രാം എംഡിഎംഎയുമായി കഴിഞ്ഞദിവസം എക്‌സൈസ് പിടികൂടിയിരുന്നു. ഇതേത്തുടര്‍ന്ന് ഗ്രേസി വലിയ മാനസിക സംഘര്‍ഷത്തിലായിരുന്നുവെന്ന് ബന്ധുക്കള്‍ പറഞ്ഞു.

ശനിയാഴ്ച പുലര്‍ച്ചെ അഞ്ചോടെയാണ് വീട്ടിലെ കിടപ്പുമുറിയില്‍ ഗ്രേസിയെ തൂങ്ങിയ നിലയില്‍ ബന്ധുക്കള്‍ കണ്ടത്. ഉടന്‍ തന്നെ കയര്‍ ഊരുമാറ്റി ആശുപത്രിയില്‍ എത്തിച്ചെങ്കിലും മരിച്ചിരുന്നു. മൃതദേഹം മെഡിക്കല്‍ കോളേജ് ആശുപത്രി മോര്‍ച്ചറിയിലാണ്. സംഭവത്തില്‍ കേസെടുത്ത് അന്വേഷണം നടത്തുമെന്ന് പോലീസ് അറിയിച്ചു.

വെള്ളിയാഴ്ച വൈകിട്ടാണ് ഷൈനോയെ എക്‌സൈസ് സംഘം പിടികൂടിയത്. 0.4ഗ്രാം എംഡിഎംഎയും കണ്ടെത്തിയിരുന്നു. ഷൈനോ ലഹരി വില്പന നടത്തിയിരുന്നതായാണ് എക്‌സൈസ് പറയുന്നത്.