ബംഗളുരു എഫ്.സിയുടെ ഫിജി താരം റോയ് കൃഷ്ണ പുതിയ സീസണില്‍ ഒഡീഷ എഫ്.സിക്കൊപ്പം. ഇന്ന് താരവുമായി ഔദ്യോഗിക കരാര്‍ ഒപ്പിട്ടുവെന്ന് ഒഡീഷ എഫ്.സി അറിയിച്ചു. ഒരു വര്‍ഷത്തേക്കാണ് കരാര്‍. കഴിഞ്ഞ സീസണ്‍ അവസാനത്തോടെ തന്നെ താന്‍ ബംഗളുരു എഫ്.സി വിടുമെന്ന് റോയ് കൃഷ്ണ അറിയിച്ചിരുന്നു.

കഴിഞ്ഞ സീസണില്‍ ബംഗളുരുവിനായി മികച്ച പ്രകടനം കാഴ്ചവച്ച താരമാണ് റോയ് കൃഷ്ണ. ഐഎസ്എല്ലിലും സൂപ്പര്‍ കപ്പിലും അവരെ ഫൈനലിലേക്ക് നയിക്കുന്നതില്‍ റോയ് കൃഷ്ണയുടെ പങ്ക് വലുതായിരുന്നു. 22 മത്സരങ്ങളില്‍ നിന്ന് ആറു ഗോളുകളും അഞ്ച് അസിസ്റ്റുകളുമാണ് താരം നേടിയത്.

മുപ്പത്തിയഞ്ച് കാരനായ താരം മോഹന്‍ ബഗാനിലൂടെയാണ് ഐഎസ്എല്ലില്‍ എത്തുന്നത്. 2019-20 സീസണില്‍ ബഗാനൊപ്പം കിരീടം ചൂടാനും റോയ്കൃഷ്ണയ്ക്കായി. ബഗാന്‍ ജഴ്‌സിയില്‍ 66 മത്സരങ്ങള്‍ കളിച്ച റോയ് കൃഷ്ണ അവര്‍ക്കു വേണ്ടി 40 ഗോളുകളും 11 അസിസ്റ്റുകളുമാണ് സ്വന്തം പേരില്‍ കുറിച്ചിട്ടുള്ളത്.