ജവാനിൽ ഷാരൂഖിനൊപ്പം സഞ്ജയ് ദത്തും ദീപികയും; ആരാധകരെ ആവേശത്തിലാക്കി പുതിയ അപ്ഡേറ്റ്

ആറ്റ്ലി സംവിധാനം ചെയ്യുന്ന ഷാരൂഖ് ചിത്രം ജവാനിൽ ദീപിക പദുക്കോണും സഞ്ജയ് ദത്തും നിർണായക വേഷങ്ങളിലെത്തുമെന്ന് റിപ്പോർട്ട്. ജവാന്റെ ചിത്രീകരണം അവസാനഘട്ടത്തിലെത്തി നിൽക്കുമ്പോഴാണ് ഇരുവരും ചിത്രത്തിനൊപ്പം ചേരുന്നത്. കഴിഞ്ഞ ദിവസം ലിയോയുടെ കശ്മീർ ഷെഡ്യൂൾ പൂർത്തിയാക്കി മടങ്ങിയ സഞ്ജയ് ദത്ത് ജവാന്റെ സെറ്റിലേക്കാണ് പോയതെന്നും പിങ്ക് വില്ല റിപ്പോർട്ട് ചെയ്യുന്നു.

ഷാരൂഖിനൊപ്പമുള്ള ആക്ഷൻ രംഗങ്ങൾ ഉൾപ്പെടെയുണ്ടെന്നാണ് സൂചന. 5 ദിവസമാണ് സഞ്ജയ് ദത്ത് ജവാനായി നൽകിയിരിക്കുന്നത്. അതേസമയം പഠാന് ശേഷം ഷാരൂഖ് -ദീപിക ജോഡികൾ വീണ്ടും ഒന്നിക്കുന്ന ചിത്രം കൂടിയാവുകയാണ് ജവാൻ . നയൻതാര നായികയായ ചിത്രത്തിൽ അതിഥി വേഷത്തിലായിരിക്കും ദീപിക എത്തുക. ഈ മാസം 27,28 ദിവസങ്ങളിലായിരിക്കും ദീപികയുടെ ഭാഗം ചിത്രീകരിക്കുകയെന്നാണ് സൂചന . വിജയ് സേതുപതിയാണ് ചിത്രത്തിലെ വില്ലൻ

ഏപ്രിൽ പത്തിന് ചിത്രീകരണം പൂർത്തിയാകും . അതിന് ശേഷം റിലീസ് സംബന്ധിച്ച് ഔദ്യോഗിക പ്രഖ്യാപനമുണ്ടാകുമെന്നാണ് ആരാധകരുടെ പ്രതീക്ഷ. നേരത്തെ ജൂണിൽ റിലീസ് തീരുമാനിച്ചിരുന്നു. എന്നാൽ ചിത്രീകരണം വൈകിയതോടെ റിലീസ് വൈകുമെന്ന സൂചനകൾ നേരത്തെ തന്നെ പുറത്തുവന്നിരുന്നു .സെപ്റ്റംബറിലോ ക്രിസ്മസ് റിലീസായോ മാത്രമേ ചിത്രം എത്തൂവെന്നാണ് നിലവിലെ റിപ്പോർട്ടുകൾ