ഫിഫ അവാർഡ് 2023: പട്ടികയിൽ മെസി അകത്ത്, റൊണാൾഡോ പുറത്ത്
ഫിഫയുടെ മികച്ച താരത്തെ പ്രഖ്യാപിക്കാനുള്ള അന്തിമ പട്ടികയായി. മുൻ വർഷത്തെ മികച്ച താരത്തെ കണ്ടെത്താനുള്ള പട്ടികയിൽ ലയണൽ മെസി, ഏർലിങ് ഹാളണ്ട്, കിലിയൻ എംബാപ്പെ എന്നിവർ ഉൾപ്പെട്ടിട്ടുണ്ട്. എന്നാൽ മികച്ച പുരുഷ താരത്തെ കണ്ടെത്താൻ കഴിഞ്ഞ ലോകകപ്പിലെ പ്രകടനം കണക്കിലെടുക്കില്ല. കഴിഞ്ഞ ഡിസംബർ 19 മുതൽ ഓഗസ്റ്റ് 20 വരെയുള്ള പ്രകടനമാണ് പുരസ്കാരത്തിനായി പരിഗണിക്കുക.
യുവേഫയുടെ പ്ലെയർ ഓഫ് ദ ഇയർ പുരസ്‌കാരം നേടിയ ഏർലിങ് ഹാളണ്ട് തന്നെയാണ് പുരസ്‌കാരത്തിനുള്ള സാധ്യതാ പട്ടികയിൽ മുൻപന്തിയിൽ. ഹാളണ്ടിന് പുറമെ കെവിന്‍ ഡി ബ്രൂയ്ന്‍, ജൂലിയന്‍ അല്‍വാരസ്, ബെര്‍ണാഡോ സില്‍വ, റോഡ്രി, സിറ്റിയുടെ ക്യാപ്റ്റനായിരുന്ന ഇല്‍കായ് ഗുണ്ടോഗന്‍ എന്നിവരും പട്ടികയിൽ ഉൾപ്പെടുന്നു. പട്ടികയിൽ റൊണാൾഡോ ഉൾപ്പെട്ടിട്ടില്ല.
യുവേഫയുടെ വനിതാ ലോകകപ്പ് പ്ലെയർ ഓഫ് ദ ടൂർണമെന്റ് കിരീടം നേടിയ സ്‌പെയിനിന്റെ ഐറ്റാന ബോൺമതി സ്‌പെയിൻ സഹതാരം ജെന്നി ഹെർമോസോയ്‌ക്കൊപ്പമാണ് മികച്ച താരത്തിനുള്ള അവാർഡിന് നാമനിർദ്ദേശം ചെയ്യപ്പെട്ടിരിക്കുന്നത്. ബോൺമതി, മാപി ലിയോൺ, ഹെർമോസോ എന്നിവരാണ് 16 പേരുടെ പട്ടികയിലുൾപ്പെട്ട മൂന്ന് സ്പാനിഷ് ഫുട്ബോൾ താരങ്ങൾ.
പീറ്റർ ഗെർഹാർഡ്‌സൺ, ജോനാഥൻ ഗിരാൾഡെസ്, ടോണി ഗുസ്‌റ്റാവ്‌സൺ, എമ്മ ഹെയ്‌സ്, സറീന വീഗ്‌മാൻ എന്നിവരാണ് വനിതാ പരിശീലകരുടെ ഫിഫ അവാർഡ് പട്ടികയിൽ ഉൾപ്പെട്ടിരിക്കുന്നത്. പെപ് ഗാർഡിയോള,സിമോൺ ഇൻസാഗി, ആൻഗെ പോസ്റ്റെകോഗ്ലോ, ലൂസിയാനോ സ്പല്ലേറ്റി, സാവി എന്നിവരാണ് പുരുഷ പരിശീലക ടീമിന്റെ യോഗ്യതാ പട്ടികയിൽ ഉൾപ്പെട്ടിരിക്കുന്നത്.
