ആദ്യ തമിഴ് വെബ്സീരീസുമായി മക്കള്‍ സെല്‍വന്‍ വിജയ് സേതുപതി. താരത്തിന്റെ ആദ്യ വെബ് സീരീസായ ഫർസിയുടെ വിജയ തിളക്കത്തിനിടെയാണ് അടുത്ത വെബ് സീരീസിന്റെ ഷൂട്ടിങ്ങും ആരംഭിച്ചിരിക്കുന്നത്. ഡിസ്നി പ്ലസ് ഹോട്ട്സ്റ്റാറിലൂടെ സ്ട്രീം ചെയ്യുന്ന സീരീസിന്റെ വിവരങ്ങള്‍ ട്വിറ്ററിലൂടെയാണ് പുറത്തു വിട്ടത്. ദേശീയ അവാർഡ് ജേതാവ് എം മണികണ്ഠനാണ് ചിത്രത്തിന്റെ സംവിധാനം.

കാക്ക മുട്ടൈ, ആണ്ടവൻ കാറ്റലൈ, കടൈശി വ്യവസായി തുടങ്ങിയ സൂപ്പർ ഹിറ്റ് ചിത്രങ്ങളിലൂടെ പ്രേക്ഷകർക്ക് സുപരിചിതനായ മണികണ്ഠന്റെ മിക്ക ചിത്രങ്ങളിലും വിജയ് സേതുപതി ആയിരുന്നു നായകൻ. കോളിവുഡിന്റെ മുൻനിര താരങ്ങളിലൊരാളായ വിജയ് സേതുപതിയുടെ ആദ്യ തമിഴ് വെബ് സീരീസ് കൂടിയാണിത് . സൂപ്പർഹിറ്റ് കോമ്പിനേഷനായ

മണികണ്ഠനും വിജയ് സേതുപതിയും വീണ്ടും ഒരുമിക്കുന്നത് ആരാധകരിൽ ആവേശം വർദ്ധിപ്പിച്ചിട്ടുണ്ട്.

ചിത്രത്തിന്റെ പൂജാ ചടങ്ങിന്റെ ചിത്രം വിജയ് സേതുപതി തന്നെയാണ് പങ്കുവച്ചത്. 7 സി എന്റര്‍ടെയ്ന്‍മെന്റ്‌സ് പ്രൈവറ്റ് ലിമിറ്റഡാണ് സീരീസിന്റെ നിർമാണം. രാജേഷ് മുരുഗേശൻ സംഗീതവും ഷാൻ മുഗസുന്ദരം ഛായാഗ്രഹണവും നിർവഹിക്കുന്നു.

രാജും ഡികെയും ചേർന്ന് നിർമിച്ച ഫർസിയാണ് വിജയ് സേതുപതി അവസാനമായി അഭിനയിച്ച വെബ് സീരീസ്, ഫെബ്രുവരി 10 ന് ആമസോൺ പ്രൈം വീഡിയോയില്‍ വന്ന സീരീസ് വൻ വിജയമായിരുന്നു. ഷാഹിദ് കപൂർ, റാഷി ഖന്ന എന്നിവരാണ് ഫർസിയിലെ മറ്റ് പ്രധാന താരങ്ങള്‍.