വടചെന്നൈ രണ്ടാം ഭാഗം ഉടനുണ്ടാകില്ല; പ്രതികരണവുമായി വെട്രിമാരൻ

വടചെന്നൈ രണ്ടാംഭാഗം ഉടൻ ഉണ്ടാകില്ലെന്ന് സംവിധായകൻ വെട്രിമാരൻ. സിനിമ എപ്പോൾ ചെയ്യാൻ സാധിക്കുമെന്നറിയില്ലെന്ന് വെട്രിമാരൻ ഒരു പൊതുപരിപാടിയിൽ പറഞ്ഞു.

പ്രേക്ഷകർ കാലങ്ങളായി കാത്തിരിക്കുന്ന സിനിമയാണ് ധനുഷ്-വെട്രിമാരൻ ചിത്രമായ വടചെന്നൈയുടെ രണ്ടാം ഭാഗം. തന്റെ ഷൂട്ടിങ് പൂത്തിയാക്കിയ സിനിമപോലും എപ്പോൾ പുറത്തുവരുമെന്ന് അറിയാത്ത സാഹചര്യത്തിൽ വടചെന്നൈ എപ്പോൾ സംഭവിക്കുമെന്ന് പറയാൻ സാധിക്കില്ലെന്നാണ് വെട്രിമാരൻ പറയുന്നത്.

2023ൽ റിലീസ് ചെയ്ത, സൂരിയും വിജയ് സേതുപതിയും പ്രധാനവേഷങ്ങളിലെത്തിയ വിടുതലൈ ഒന്നാം ഭാഗമാണ് അവസാനം പുറത്തിറങ്ങിയ വെട്രിമാരൻ ചിത്രം. ഈ അടുത്ത് പങ്കെടുത്ത ഒരു പൊതുപരിപാടിക്കിടെ കാഴ്ചക്കാരിലൊരാളാണ് വടചെന്നൈ രണ്ടാം ഭാഗത്തെ കുറിച്ച് ചോദിച്ചത്.

എപ്പോഴാണ് റിലീസ് ഉണ്ടാവുക എന്ന് പറയാൻ സാധിക്കില്ലെന്നും ഷൂട്ടിങ് പൂർത്തിയാക്കിയ വിടുതലൈ രണ്ടാം ഭാഗം പോലും എപ്പോൾ പുറത്തുവരുമെന്ന് തനിക്ക് അറിയില്ലെന്നും വെട്രിമാരൻ മറുപടി നല്‍കി. അതിനുശേഷം പുറത്ത് വരാനുള്ളത് വാടിവാസലാണ്. അതും കഴിഞ്ഞ് താൻ എന്ത് ചെയ്യുമെന്ന് അറിയില്ലെന്നും വെട്രിമാരൻ പറയുന്നു.