'ദളപതി 68' ൽ വിജയ് വിന്റേജ് ലുക്കിൽ ; 10 മിനിറ്റ് ഡി-എജിങ് ടെക്‌നോളജിക്ക് ചിലവാക്കുന്നത് ആറു കോടി രൂപ
ലിയോയ്ക്ക് ശേഷം വിജയ് നായകനാവുന്ന പുതിയ ചിത്രത്തിനായുള്ള കാത്തിരിപ്പിലാണ് ആരാധകർ. വെങ്കട്ടപ്രഭു സംവിധാനം ചെയ്യുന്ന ചിത്രത്തിന് 'ദളപതി 68' എന്നാണ് താൽക്കാലികമായി പേരിട്ടിരിക്കുന്നത്. ചിത്രത്തിനെ കുറിച്ചുള്ള ഓരോ അപ്‌ഡേറ്റും ആരാധകർ ആഘോഷമാക്കുകയാണ്.
ഇപ്പോഴിതാ ചിത്രത്തിൽ വിജയ് തന്റെ വിന്റേജ് ലുക്കിൽ എത്തുമെന്നാണ് പുറത്തുവരുന്ന ഏറ്റവും പുതിയ റിപ്പോർട്ട്. 2000 - 2005 കാലഘട്ടത്തിലുള്ള ലുക്കിലാണ് പുതിയ ചിത്രത്തിൽ വിജയ് എത്തുന്നത്. ചിത്രത്തിൽ 10 മിനിറ്റ് ദൈർഘ്യത്തിലാണ് വിജയ് പഴയ രൂപത്തിൽ എത്തുന്നത്. ഇതിനായി ഡി എജിങ് ടെക്‌നോളജി ഉപയോഗിച്ച് വിജയുടെ രംഗങ്ങൾ ചിത്രീകരിച്ചതായാണ് റിപ്പോർട്ട്.
ആറ് കോടി രൂപയാണ് 10 മിനിറ്റ് നേരമുള്ള ഈ ദൃശ്യങ്ങൾക്കായി ചെലവഴിച്ചതെന്നാണ് റിപ്പോർട്ട്. സിനിമയുടെ ചിത്രീകരണത്തിന് മുമ്പായി വിജയ് യുഎസിൽ പോവുകയും 3ഡി വിഎഫ്എക്‌സ് സ്‌കാൻ എടുത്തതും നേരത്തെ വാർത്തയായിരുന്നു.
നിലവിൽ 'ദളപതി 68' ന്റെ ചിത്രീകരണം ഹൈദരാബാദിൽ നടക്കുകയാണ്. ഇന്ത്യയിലെ ചിത്രീകരണം പൂർത്തിയാക്കിയ ശേഷം ഇസ്താംബൂളിലായിരിക്കും സിനിമയുടെ അടുത്ത ഷെഡ്യൂൾ ആരംഭിക്കുക.
വിജയ്, പ്രശാന്ത്, പ്രഭുദേവ, സ്നേഹ, ലൈല, മോഹൻ, മീനാക്ഷി ചൗധരി, യോഗി ബാബു, അജ്മൽ, ജയറാം, യുഗേന്ദ്രൻ, വൈഭവ്, പ്രേംജി , അരവിന്ദ് ആകാശ് തുടങ്ങി നിരവധി താരങ്ങളാണ് 'ദളപതി 68' ൽ അഭിനയിക്കുന്നത്. യുവൻ ശങ്കർ രാജയാണ് ചിത്രത്തിന്റെ സംഗീത സംവിധാനം.
